اليوم الرابع

اليوم الرابع : 

23/11/2018 

في شي نسيت اقوله لكم عن امس 

بالوقت اللي هم يشوون ويطبخون والريحه 

مبخره البيت كله أنا دخلت الغرفه 

وسويت ماسك لشعري وتسبحت 

وسشورت شعري ، بهالوقت هم خلصوا أكل

وكل اللي شفته صور بس بالواقع ماشفت 

وهالشي وايد زين لان أنا أصلا خلاص 

مافي فرصه إني أخرب الدايت 

الأكل : بحح 👊🏽!!

اليوم : أول ما قمت الصبح 

وزنت لقيته : 79.0 

حزنت صراحه انه من المغرب 

للصبح نزل ميتين قرام ، 

وبنفس الوقت فرحت انه الرقم 

كل ما اوقف ع الميزان يتغير واني الحين

 على مشارف رقم يديد 👏!!

صح نسيت أقولكم عن أجمل شعور

 ممكن تحسين فيه هو " كلمة " : مابا .. 

يعني يوم حد يزقرني ع الاكل

 او يسالني نخلي لج غدا او سويت

 او شي اقول : لا مابا .. ( ما أريد ) 

لما اقولها احس خلاص مافي فرصه

للتراجع واني ارد واكل خلاص راحت علي

لازم اكمّل ؛ وتعدي الساعات وايي يوم 

يديد ، كنت ممكن استمتع فيه بالاكل

وازيد وزن ويخترب شكلي اكثر و اكثر

لكن الحمدلله 💙💙.

المهم اني قررت بعد اليوم اني اتريق 

و شربت شاي حليب رغم انه كان طعمه 

يلوّع الجبد 🤦🏻‍♀️

الحمدلله ع النعمه ، بس قلت يالله طاقه 

والحين حسيت اني لو ماتريقت وبس

 شربت ماي كنت بقدر اكمل ، 

لكن سبحان الله حسيت افضل 

أعوّد نفسي يومين ع وجبة الريوق 

بس بعدين ارجع للماي 

اكون مهدت الطريق لجسمي 

بالحرمان والريجيم القاسي ، 👏!! 

والجميييل فالموضوع : 

بنت جيراننا تحمست وبدت دايت الماي 

وهالشي خلاني اكثر اندم اني تريقت 🤦🏻‍♀️!

حسيت حلو لو قمنا باجر الصبح 

وباثنينا ناقصين كيلو كيلو 😞💙

لكن يالله باجر ماي فقط 💧 

الحين صلاة الظهر من يوم الجمعه ؛ 

مشيت شوي فالبيت عشان أحرق الريوق 

والحمدلله قدرت أنزّل الريوق كلهه 💩!!

الغدا كانت ريحته فضيييعه 

واصله لخشمي رغم اني فـ مكان بعيد 

يلست اشوف مسلسل سرايا عابدين

عشان اتسلى ؛ بس لان الغدا سمج

فـ الريحه تفوووح 🌬 🐟 !! 

الساعه 6:30 وصلت الكوب العاشر 

يعني لترين ونص ؛ باقي لي كوبين 

وأخلص ثلاثه لتر 🎚!!

الحين الساعه : 7:00 

توه أذن العشا عندنا ، ويتني الدوره 🤦🏻‍♀️

لكن عموماً أنا جربت أسوي هالدايت قبل

وانواع ثانيه مع الدوره

ما تأثر فيني الحمدلله - بالنسبه لي أنا - 

فـ عشان جي بستمر ان شاء الله 

لأن حرام أوقف سبع او ثمان ايام

اقدر انزل فيهم كيلوات 👏

المهم وزنت : 78.9 💃🏻!! 

صح من الصبح بس نزلت مية قرام

بس هذا الوزن وأنا متريقه + طول الوقت أشرب ماي يعني الرقم الصح بيطلع باجر الصبح

بكمل الكوبين الباقيات ؛ وعقب برقد 💤

ونلتقي فـ اليوم الخامس 💧.